Адна з славутасцяў Лявонпаля - драўляны храм другой паловы 18 стагоддзя. У большасці крыніц сустракаецца 2 асноўныя версіі будаўніцтва. Згодна з першым варыянтам, тагачасныя ўладальнікі Лапацінскія, пабудавалі ў 1774 годзе уніяцкую царкву. Па іншай версіі, першапачаткова будаваўся касцёл, а працы праходзілі з 1772 па 1784 год.
На карысць версіі аб касцёле сведчыць першапачатковая архітэктура: храм меў дзве высокія сіметрычныя вежы (быў падобны на касцёл у Воўпе).
Траецкая царква - гэта адзін з найстарэйшых на тэрыторыі Беларусі прыкладаў драўлянага дойлідства. Храм без асаблівых дэкаратыўных вынаходстваў, выглядае даволі строга.
Пасля паражэння паўстання 1830 года ў Лявонпаль прыбылі казакі, якія грунтоўна разрабавалі і разбурылі багатае мястэчка. Пра лёс тагачаснага храма нічога невядома, але сустракаюцца згадкі пра мясцовы бунт сялян, якія пярэчылі ўступленню ў шэрагі праваслаўных прыхаджан. Нягледзячы на гэта, у 1840 годзе, Лявонпольскі храм перададзены ва ўлонне праваслаўнай царквы.
З часам Лапацінскія змаглі вярнуць Лявонпаль ва ўласнасць, але ўкладвацца ў яго развіццё і аднаўленне не спяшаліся, аддаючы перавагу іншым сваім маёнткам. Так, напрыклад, у 1857 годзе Ігнат Лапацінскі пабудаваў унікальны неагатычны касцёл у Сар'і.
Падчас Другой сусветнай вайны драўляная царква моцна пацярпела, верагодна гэта стала адной з прычын для рашэння перабудаваць храм і прыбраць вежы.
Каля храма ёсць драўляная двух'ярусная званіца, якая пабудавана ў сярэдзіне 19 стагоддзя. Як і царква, часткова перабудавана ў 50-ыя.
Царква знаходзіцца адразу на ўездзе ў Лявонпаль, ля павароту на сядзібу. Ніжэй кропка з адзнакай на мапе:
Калі будзеце ў гэтай вёсцы, то абавязкова паглядзіце мемарыяльную калону ў гонар Канстытуцыі Рэчы Паспалітай ад 3 траўня 1791 года.