Па суседстве з руінамі замка Сапегаў у пачатку 19 стагоддзя быў закладзены палац, які з часам стане дамінантай парка ў Высокім. Новы сядзібны комплекс будаваўся на замову Пелагеі Патоцкай, жонкі князя Паўла Сапегі.
Палац у горадзе Высокае – гэта ўзор класічнай архітэктуры, па форме будынак прамавугольны, сіметрычны. Галоўны ўваход упрыгожаны масіўным порцікам на чатырох калонах.
Увагі вартыя і афіцыны, якія размяшчаюцца паабапал ад палаца. Па форме яны “Т”вобразныя, як і сама сядзіба, – аднапавярховыя. Звярніце ўвагу на кантавы фасад, упрыгожаны шасцю паўкалонамі.
На верхнім фота – левая афіцына, правая амаль цалкам разбурана.
Паркавы фасад сядзібы мае цікавы рызаліт, які ўвянчаны атыкам. З гэтага боку размяшчалася вялікая тэраса, дзе любілі адпачываць гаспадары, таксама адсюль адкрываўся файны краявід на парк.
Дарэчы парк Патоцкіх часткова захаваўся і да нашых дзён, ацалеў нават стары “пейзажны маршрут” які цягнецца да самой брамы і аранжарэі. Па шляху можна ўбачыць і некаторыя гаспадарчыя пабудовы, а таксама службовыя карпусы.
Інтэр’еры палаца вылучаліся багатым афармленнем. У салоне і асноўных залах быў пакладзены дарагі паркет, меліся прыгожыя каміны, жырандолі з крышталю, мэбля ў стылі Людовіка 15 і Людовіка 16. Сцены ўпрыгожвалі сямейныя партрэты Патоцкіх і Сапегаў, сярод іх вылучаўся партрэт самой Пелагеі.
Яго напісала ў Дзярэчыне мастачка Элізабэт Вігі-Лебрун, якая была вядома па выкананні партрэтаў манархаў і розных знакамітых асоб (Лорда Байрана, Марыі Антуанэты, лэдзі Гамільтан). Пелагея на карціне нагадвала Тэрпсіхору, апякунку карагодаў і танцаў. Што цікава, карціна захавалася.
У 1865 годзе, яе вывез сын Ксаверый у Берыц, Францыя, дзе яна захоўвалася нашчадкамі да 1990 году, пакуль не згасла лінія Пелагеі Патоцкай. Затым карціна перайшла ў замак Мантрэса, да калекцыянера Станіслава Рэя.
Пасля 1939 года сядзіба нацыяналізавана і канфіскавана. За савецкім часам на тэрыторыі маёнтка знаходзілася школа-інтэрнат (дзейнічае і сёння, але як санаторная школа). Побач з палацам у 60-ыя ўзвялі асноўны цагляны корпус, а будынак самой сядзібы прыстасавалі пад спальныя пакоі для дзяўчынак. Да пачатку 90-ых пабудову палаца ўжо амаль не выкарыстоўвалі, толькі для складскіх мэт.
Большая частка маёнтка Патоцкіх – гэта парк, які быў разбіты вакол палаца. Марыя Патоцкая, адна з апошніх уласніц, была нават узнагароджана прэміяй Парыжскай сельскагаспадарчай выставы за развіццё гэтага паркавага комплексу.
З 90-ых будынак пуставаў, але ў пэўнай ступені дагледжаны. У 2013 годзе былую сядзібу Сапегаў-Патоцкіх прадалі на аўкцыёне. Новы ўладар планаваў арганізаваць у Высокім турыстычны цэнтр з гатэлем і рэстаранам, але на жаль рэалізаваць праект не атрымалася.
З 2020 года аб’ект ізноў спрабуюць прадаць. Сама пабудова да 2023 года знаходзілася за высокім плотам і ахоўвалася вартаўнічымі сабакамі, таму паглядзець сядзібу было складана. Зараз плот прыбралі і палац можна лёгка агледзець і нават абысці вакол.
У горадзе Высокае захаваўся старажытны Траецкі касцёл 18 стагоддзя і былы кляштар баніфратаў. Таксама пры магчымасці адпраўляйцеся паглядзець Камянецкую вежу – адну з галоўных цікавостак гэтага рэгіёна.
