Пад час вандровак па Беларусі можна наткнуцца на гісторыі розных цікавых аб’ектаў, якія на жаль, да нашага часу не захаваліся. Так напрыклад каля вёскі Аношкі, што ў Нясвіжскім раёне, калісьці стаяла прыгожая сядзіба роду Чапскіх – маёнтак Наруцэвічы. Тутака быў і сядзібны дом, і багатая гаспадарка, але ў вірах беларускай гісторыі ўсё гэтае багацце было цалкам страчана. Але калі ўважліва паблукаць па ваколіцах, то тое злёгку атрымаецца адшукаць стары парк, будынак стайні і нават падмуркі самой сядзібы.
Былы маёнтак Наруцэвічы месціўся на невялікім прытоку ракі Ушы і працяглы час належаў прадстаўнікам роду Чапскіх. Мяркуецца, што першым з гэтага слаўнага роду, хто валодаў Наруцэвічамі, быў Караль Чапскі і ягоная жонка Фабіяна Абуховіч, ад якой ён хутчэй за ўсё і атрымаў маёнтак у пасаг.
Чапскія валодалі маёнткам ажно да 1939 года. Апошні ўладар – Францішак Эдвард Чапскі, які скончыў жыццё самагубствам у верасні 1939 года, так і не з’ехаўшы з Наруцэвічаў.
Сядзіба “Наруцэвічы” была вельмі доўгім аднапавярховым цагляным будынкам, які хутчэй за ўсё збудавалі ў першай палове 19 стагоддзя. Паабапал ад асноўнага аб’ёму размяшчаліся два сіметрычных ганка ў неагатычным стылі. Да таго ж, сядзіба вылучалася і цікавай васьміграннай вежай з гадзіннікам, – яна таксама мела неагатычныя рысы.
Будынак сядзібы Чапскіх быў тынкаваны, з выразна акрэсленымі рамамі вакол паўкруглых вокнаў і дзвярэй. На верхнім паверсе вежы знаходзіліся балконы з каванымі кратамі, якія дарэчы, маляўніча выходзілі на ўсе чатыры бакі свету.
Калі пачалася Другая сусветная вайна, былы будынак сядзібы стаў паліцэйскім гарнізонам. За савецкім часам у ім ужо не знайшлі патрэбы і наўпрост зруйнавалі. Мяркуецца, што гэта адбылося ў канцы 60-ых гадоў.
Ніжэй кропка з месцам дзе стаяла сядзіба Наруцэвічы:
У гэтым краі будзе цікава заехаць у Нясвіж, дзе шмат гістарычных помнікаў. Таксама раю заехаць у Сноў да палац Рдултоўскіх.
