Давыд-Гарадок размешчаны каля трасы Р88, паміж Столінам і Туравам. Са славутасцяў у горадзе хочацца вылучыць некалькі аб'ектаў: драўляную царкву, касцёл, помнік князю Давіду і мураваны. храм Казанскай іконы Маці Божай. Якраз пра апошні крыху падрабязней.
Казанская царква з'явілася ў 1913 годзе, будавалася на месцы папярэдніх храмаў. Па архітэктуры пабудова адносіцца да традыцыйных узораў псеўдарускага стылю. Вылучаецца сваім блякла-ружовым колерам (раней чырвоным), па-свойму нетыповым, бо большасць праваслаўных храмаў Палесся сінія і да таго ж выкананы ў асноўнай сваёй масе з дрэва.
Перад уваходам на тэрыторыю стаіць трох'ярусная брама, завершаная цыбульнай глаўкай.
З характэрнага можна адзначыць капліцу, размешчаную на куце агароджы і стылістычна добра гарманавальнай з царквой. Яна пабудавана, як і храм, у 1913 годзе.
Царква ў Давыд-Гарадку. мае даволі стандартную структуру: прытвор, вежа-званіца і малітоўная зала, да якой прымыкаюць невялікія паўкруглыя рызніцы. Асноўны аб'ём храма завяршаецца традыцыйным цыбульнымі глаўкамі (іх усяго 5+1 на вежы +2 на рызніцах + 1 на капліцы і не забываем тую што на браме).
Знайсці гэтую гарадскую славутасць не складзе вялікай працы. Ад вуліцы Савецкай зварочвайце каля плошчы на вуліцу Юхневіча, ніжэй адзнака з кропкай на мапе.
Калі будзеце ў гэтых краях, то рэкамендую паглядзець старадаўні драўляны храм 1762 года ў вёсцы Рэмель.
