У центры горада Стоўбцы можна ўбачыць не толькі незвычайны кінатэатр, а яшчэ і цікавы мурал, на якім намаляваны даволі дзіўны храм з дзвюма рознымі вежамі. Гэта - старадаўні касцёл Святога Казіміра, які размяшчаўся на месцы сённяшняга стадыёна на вуліцы Ленінскай.
Гісторыя касцёла пачынаецца ў сярэдзіне 17 стагоддзя, калі ў Стоўбцы прыбыла місія манахаў-дамініканцаў. Як гэта часта бывала, спачатку манахі ўзвялі невялікі драўляны жылы корпус, а пад малітвы выкарыстоўвалі старэнькі храм у суседняй Кавалеўшчыне (там дарэчы захавалася невялічкая сядзіба). За некалькі дзясяткаў гадоў дамініканская місія разраслася і былі пачаты работы па ўзвядзенні мураванага касцёла.
Цалкам магчыма, што храм быў перабудаваны ў першай палове 17 стагоддзя пры новых уладальніках Стоўбцаў - Чартарыйскіх. Архітэктура касцёла адносіцца да стылю ранняга барока, прыкладаў якога на тэрыторыі Беларусі захавалася зусім няшмат.
Пасля паўстання 1830 года кляштар дамініканцаў у Стоўбцах ліквідаваны, а праз 40 гадоў будынак касцёла перабудуюць пад праваслаўны храм. Да асноўнага аб'ёму дададуць прытвор, на даху з'явіцца светлавы барабан, а над франтонам вырасціць вялізная вежа. Новае аблічча храма не стане ўнікальным, падобныя перабудовы сустракаліся паўсюдна (асабліва падобная царква ў Крывошыне).
У 1921 годзе Стоўбцы ўваходзілі ў склад Міжваеннай Польшчы, таму старажытны храм вярнулі каталіцкай абшчыне, тады ж пачаліся паэтапныя работы па аднаўленні касцёла. Менавіта ў той перыяд ля храма з'явіліся дзве разнапланавыя вежы.
Падчас Другой сусветнай вайны будынак быў часткова разбураны, аднаўляць яго ўжо не сталі, а ў 1958 годзе руіны канчаткова разабраны. Сёння на тым месцы, дзе стаяў касцёл Святога Казіміра, узвялі копію брамы, прыкметную на многіх старых здымках.
Ніжэй кропка з адзнакай месца, дзе знаходзіўся касцёл у Стоўбцах:
У горадзе яшчэ варта паглядзець царкву Святой Ганны і заехаць да музея Якуба Коласа.
