На Прывакзальнай плошчы ў Шклове захаваўся цудоўны і цэласны архітэктурны ансамбль пачатку мінулага стагоддзя. Тут вас чакае даволі нетыповы мураваны вакзал, воданапорная вежа, якая чымсьці нагадвае прамысловы “данжон”, і помнік у гонар Апалона Крывашэіна.
Чыгуначная станцыя ў Шклове з’явілася ў ходзе будаўніцтва важнай лініі Віцебск-Жлобін. Сам будынак вакзала быў узведзены ў 1906 годзе. Архітэктары таго часу вырашылі адысці ад стандартных шэрых праектаў і пабудавалі невялічкі “палацык” у стылі мадэрн з выразнымі элементамі і стылю неаготыка. Зразумела, што ўнутраныя залы чакання сёння адрэстаўраваныя, але будынак цалкам захаваў свае гістарычныя прапорцыі і з’яўляецца гісторыка-культурнай каштоўнасцю.
Вежа ў Шклове досыць тыповая, выкладзена з чырвонай цэглы і бутавага каменю. У добрым стане.
Акурат на пероне вакзала турыстаў сустракае вельмі каларытная жанравая скульптура, што была ўсталявана ў гонар Апалона Крывашэіна. Гэта дзяржаўны дзеяч, які ў свой час займаў пасаду міністра шляхоў зносін імперыі і меў непасрэднае дачыненне да развіцця чыгуначнага руху на беларускіх землях. Дзякуючы свайму высокаму міністэрскаму статусу, Крывашэін прыклаў велізарныя намаганні, каб новая стратэгічная чыгуначная лінія Віцебск-Жлобін прайшла менавіта праз Шклоў. Помнік з’явіўся на пероне ў 2014 годзе.
Шклоўскі вакзал, ці нават чыгуначны комплекс, – гэта выдатны прыклад таго, як звычайная інфраструктурная кропка можа ператварыцца ў самастойную архітэктурную цікавостку горада. Ніжэй адзнака на мапе:
У Шклове будзе цікава паглядзець будынак ратушы і гандлёвыя рады. Калі хочацца чагосьці незвычайнага – можна з’ездзіць пашукаць Шклоўскі замак у Рыжкавічах.
