Беняконі - гэта невялікі аграгарадок, амаль на самай мяжы з Літвой, размяшчаецца на магістральнай трасе М1. Напэўна, многія падарожнікі і аматары паездак у Вільнюс праязджалі гэтае месца. Са славутасцяў тут варта вылучыць касцёл Святога Іаана Хрысціцеля.
Каменны касцёл у Беняконі пабудаваны ў пачатку 20 стагоддзя. Архітэктурны стыль, да якога адносіцца будынак эклектыка з элементамі неабарока і неакласіцызму.
Працы над храмам вяліся з 1900 па 1902 год.
Касцёл у Беняконі — гэта двухвежавая, трохнефная базіліка з папярочным нефам, магутнымі трох'яруснымі вежамі-званіцамі і прастакутнымі рызніцамі. Галоўны алтар узведзены ў неакласічным стылі і ўпрыгожаны каланадай.
У цэнтры алтара знаходзяцца маляўнічая выява сцэны Вадохрышча Гасподняга. Роспіс інтэр'ера выкананы мастаком К. Квяткоўскім.
Касцёл уключаны ў Дзяржаўны спіс гісторыка-культурных каштоўнасцей Рэспублікі Беларусь, ніжэй кропка з адзнакай славутасці на мапе:
Недалёка ад аграгарадка Беняконі можна паглядзець яшчэ два цікавыя архітэктурныя аб'екты: касцёл Адшукання Святога Крыжа і руіны сядзібы Радзівілаў у Жырмунах..