Вёска з гучнай і прыгожай назвай Белагруда знаходзіцца прыкладна за 15 кіламетраў ад горада Ліда. Першыя пісьмовыя звесткі пра гэтае мястэчка адносяцца да першай паловы 16 стагоддзя, тады землі належалі роду Завішаў. Каталіцкая парафія была арганізавана ў пачатку 17 стагоддзя, а ў 1609 годзе быў закладзены і першы драўляны храм. Што цікава, амаль праз 3 стагоддзі, на ягоным месцы збудуюць шыкоўны касцёл Святога Міхаіла Арханёла – візітоўку вёскі Белагруда, якую можна паглядзець і сёння.
Да будаўніцтва гэтай камяніцы прыступілі напачатку 20 стагоддзя, а калі дакладна – у 1903 годзе. Вынікам складанай пяцігадовай працы стаў унікальны неараманскі храм з элементамі неаготыкі, які цалкам скончылі ў 1907 годзе (асвячоны ў 1908).
Назву захавалі ад драўлянага папярэдніка, на месцы якога і быў пабудаваны сучасны касцёл, – Белагрудскі касцёл Святога Міхала Арханёла.
Яшчэ адзін адметны момант: на могілках захавалася драўляная капліца ці званіца, якая старэйшая за касцёл.
Дакладная дата будаўніцтва – невядомая, але мяркуецца, што гэта дзесьці сярэдзіна 19 стагоддзя. На старым фота, можна ўбачыць і гэтую капліцу і касцёл-папярэднік.
У гэтай каплічцы-званіцы нават захавала аўтэнтычная дахоўка.
Касцёл у Белагрудзе – гэта трохнефавая двухвежавая базіліка, дзе дамінантамі з’яўляюцца вялізныя 2 двух’ярусныя вежы з шатровымі завяршэннямі.
Да асноўнага аб’ёму храма далучаюцца больш нізкія прыбудовы трансепта, пяціграннай алтарнай часткі і бакавых сакрысціяў. Храм багаты на вонкавы дэкор, воку сапраўды хапае розных дробязяў за якія зачапіцца.
На галоўным фасадзе ўваход вылучаны высокім парталам і акном-ружай.
Касцёл месціцца на старых могілках, якія абнесены каменнай агароджай. Цікава, што ўсе пахаванні і магілы ўтвараюць дугу вакол будынка, такі парадак і сіметрыю ўбачыш не часта.
Побач з касцёлам стаіць і драўляная плябанія, магчыма гэта аўтэнтычны будынак канца 19 стагоддзя, як мінімум, распалагаецца ён на месцы папярэдніка.
Лёс касцёла за савецкім часам быў туманны, аднак часта сустракаецца інфармацыя, што храм зусім не закрываўся, а з сярэдзіны 70-ых атрымаў статус помніка архітэктуры.
Сёння храм у Белагрудзе дзеючы і адкрыты для ўсіх ахвочых, ніжэй кропка з размяшчэннем гэтай цікавосткі Беларусі на мапе:
Калі плануеце паездку ў бок Гродна, то паспрабуйце зазірнуць у гэтае месца, касцёл вас сапраўды не расчаруе! У суседняй вёсцы Тарнова будзе яшчэ цікава паглядзець сядзібу Маўросаў.
