Калі вы плануеце наведваць старыя хрысціянскія могілкі ў Бешанковічах, абавязкова пашукайце невялікі, але вельмі прыгожы будынак з чырвонай цэглы – гэта былая капліца Храптовічаў. Што цікава, інфармацыя пра гэтую капліцу была знойдзена толькі нядаўна, дзякуючы аналізу архіўных мемуараў сям’і Храптовічаў-Буценевых. Так стала дакладна вядома, што пабудова – лютэранская капліца-пахавальня 1881 года. Мяркуецца, што менавіта тутака знайшлі свой апошні спачын граф Ірэней Храптовіч і ягоная жонка Караліна.
А чаму капліца лютэранская, для Беларусі гэта ж досыць рэдка? Усё проста – Караліна Храптовіч была каталічкай, а вось граф Ірэней Храптовіч прыняў лютэранства. З-за гэтага іхнія нашчадкі ўзвялі для спачыну бацькоў лютэранскі склеп, але на старых могілках дзе багата было пахавана і каталікоў.
З парай Храптовічаў дарэчы звязана цікавая і вельмі папулярная гісторыя кахання, якая скончылася тым Бешанковічы на цэлае дзесяцігоддзе сталі месцам іх “элітарнай ссылкі”, а легендарны палац – домам.
Сама капліца-пахавальня мае вельмі цікавую архітэктуру. Прасочваюцца строгія гатычныя лініі, стральчатыя вокны і нішы, якія робяць капліцу падобнай на мініяцюрны сярэднявечны замак.
Перад уваходам на тэрыторыю могілак узвышаецца брама з цэглы, відавочна, што яна з’яўляецца часткай агульнай кампазіцыі капліцы і імаверна збудавана ў той жа час, – канец 19 стагоддзя.
Нягледзячы на тое, што за савецкім часам склеп быў разрабаваны, а сам будынак пуставаў, муры выдатна захаваліся і сёння з’яўляюцца найважнейшым матэрыяльным напамінам пра эпоху росквіту “Бешанковіцкага ключа” Храптовічаў. На маю думку гэты аб’ект можа стаць вартым пунктам для вандроўнікаў і турыстаў, якія хочуць больш даведацца аб гісторыі знакамітага магнацкага роду. Ніжэй кропка з адзнакай гэтай цікавосткі на мапе:
Вам будзе таксама цікава паглядзець старыя габрэйскія могілкі ў Бешанковічах – адзін з найбуйнейшых, найстарэйшых і самых атмасферных некропаляў Беларусі. Па магчымасці заехаць у Бачэйкава, дзе калісьці стаяў шыкоўны палац.
