Вёска Дзеркаўшчына (на рускай мове – Дерковщина), згадваецца ў пісьмовых звестках ужо ў сярэдзіне 17 стагоддзя. Калісьці тутака быў і невялікі маёнтак, які належаў Бухавецкім. Сёння ў Дзеркаўшчыне галоўнай цікавосткай можна лічыць касцёл Унебаўзяцця Найсвяцейшай Дзевы Марыі.
Храм быў пабудаваны ў першай палове 19 стагоддзя, у самым цэнтры тагачаснай вёскі. Ёсць нават дакладная дата – 1822 год.
Касцёл збудавалі з бутавага каменю, таксама ён абнесены бутавай агароджай з магутнай двух’яруснай мураванай званіцай.
Будынак прамавугольны ў плане, асноўны аб’ём з двухсхільнай страхой і чатырохкалонным порцікам на галоўным фасадзе. На фоне бутавай муроўкі вылучаюцца атынкаваныя пабеленыя архітэктурныя дэталі: карнізы, ліштвы аконных праёмаў, пілястры. Агулам архітэктура касцёла хутчэй эклектычная, з рысамі стылю класіцызм.
Пасля Другой сусветнай вайны касцёл прымусова закрылі, магчыма яго прыстасавалі пад нейкія гаспадарчыя патрэбы. Але на жаль, дакладных звестак не знайшоў. Вернікам будынак павярнулі ў 1989 годзе. Ніжэй кропка з адзнакай гэтай цікавосткі на мапе:
У гэтым краі можна таксама заехаць паглядзець на капліцу ў Кіякова і да касцёла ў мястэчку Удзела.
