Горад Высокае, што ў Брэсцкай вобласці, злёгку мог бы паспаборнічаць у турыстычным патэнцыяле з якім-небудзь Косава ці нават самім Нясвіжам. Вы можа здзівіцеся, але тутака ў свой час таксама знаходзіўся сапраўдны замак, які быў узведзены яшчэ ў другой палове 17 стагоддзя пры Сапегах. На жаль, сёння ад былога абарончага збудавання захаваліся толькі руіны брамы і земляныя ўмацаванні, але і яны могуць прыемна ўразіць.
Высокае ў 1647 годзе перайшло да Паўла Яна з Сапегаў, пры ім дарэчы пачалося фармаванне будучай крэпасці, а ўжо будаўніцтва працягнуў ягоны сын.
Высокаўскі замак спачатку будаваўся як абарончы пункт, вакол ён быў акружаны ракой, надзейна ўмацаваны, таму здольны трымаць амаль любую аблогу. Аднак шмат якія пабудовы крэпасці былі выкананы з дрэва, за выключэннем той самай уязной брамы.
Пасля моцнага пажару ў 1748 годзе, які знішчыў частку замка, Сапегі перамясцілі сваю радавую рэзідэнцыю ў Слонім.
Нягледзячы на гэтыя факты, замак у Высокім не закінулі, а нават часткова аднавілі. На малюнку Напалеона Орды, добра відаць што на канец 19 стагоддзі, брама цэлая. Менавіта гэты будынак пасля і будуць лічыць замкам у горадзе Высокае (што не зусім дакладна, бо сам замак быў на месцы сённяшняга стадыёна).
Брама Сапегаў першапачаткова была двухпавярховая, памерамі каля 20 на 13 метраў, з трыма варотамі і пад’ёмным механізмам мастка. Паабапал брамы стаялі круглыя вежы і каравульныя памяшканні.
У 1816 годзе ў Высокім будуецца палац Патоцкіх, які ў далейшым забярэ на сябе дамінуючае становішча ў забудове горада і парка.
20 стагоддзе для былога замка Сапегаў не абяцала нічога добрага. Брама актыўна разбуралася і напрыканцы 90-х ужо нагадвала разваліны, у якіх складана пазнаць будынак з малюнка Орды.
Улетку 2014 года адбылася кансервацыя руін, – гэта павінна дапамагчы захаваць старадаўні помнік архітэктуры да лепшых часоў, якія пакуль яшчэ не надышлі.
Знайсці месца, дзе стаяў замак, не складзе вялікай працы. Брама знаходзіцца ў цэнтральнай частцы парка, сюды вядуць усе дарожкі і сцяжынкі. Ніжэй кропка, з адзнакай на мапе:
У Высокім яшчэ можна наведаць Траецкі касцёл і былы кляштар манахаў-баніфратаў, гэтыя будынкі адносяцца да другой паловы 18 стагоддзя.
