Капліца ў вёсцы Івашкаўцы пабудавана на мяжы 19-20 стагоддзяў, а ў некаторых крыніцах нават згадваецца дакладная дата будаўніцтва – 1908 год. Вядома што ў той час яшчэ не было касцёла Маці Божай Ружанцовай у Солах, і гэтая пахавальня выконвала ролю парафіяльнага храма.
У 1917 годзе да капліцы была прыбудавана драўляная частка і вось такім чынам і быў арганізаваны касцёл, які дзейнічаў прыкладна да 1935 года.
Сама пахавальня нагадвае нейкі невялічкі замак і вельмі маляўніча выглядае на старых могілках.
Няма дакладнай ці больш-менш праверанай інфармацыі каму належала гэтая пахавальня. Адзінае прозвішча, якое часцяком сустракаецца ў большасці крыніц – Качанаў (гэтай версіі буду прытрымлівацца і я). Аднак калі глядзець на сітуацыю лагічна, то гэты факт малаверагодны. Бо з 1876 года маёнтак і сядзіба ў Солах належала адстаўному генерал-маёру Іванову Аўксенцію Сцяпанавічу. Таму як бачыце, па датах крыху не атрымліваецца, карацей – гісторыя даволі заблытаная.
Каля капліцы ёсць і старыя пахаванні нямецкіх салдат загінуўшых у Першай сусветнай вайне. Захаваўся і невялікі каменны помнік-склеп 1918 года.
Вакол капліцы ўтварыліся даволі вялікія могілкі, тут суседнічаюць каталіцкія і праваслаўныя магілы.
Саму каплічку адчыняюць толькі на дзяды, а вось у астатні час дзверы звычайна зачыненыя.
З Мінска дабрацца сюды можна прыкладна за 1 гадзіну і 40 хвілін, гэта калі рухацца з боку горада Ашмяны. Ніжэй кропка з адзнакай гэтай цікавосткі на мапе:
Па шляху можна заехаць да Крэўскага замка і Барунскага кляштара. Івашкаўцы – гэта не самыя папулярныя мясціны Беларусі, але паглядзець каплічку будзе дакладна цікава.
