Манькавічы – гэта невялічкая вёска ў Віцебскай вобласці, Пастаўскі раён. Для аматараў падарожжаў па Беларусі тутака знойдзецца некалькі цікавых аб’ектаў: штучны вадаспад, царква і руіны капліцы. Калісьці даўно ў Друцкіх-Любецкіх тут была сядзіба і багатая гаспадарка, аднак да нашых дзён гэтыя будынкі на жаль не захаваліся.
Праехаўшы цераз усю вёску Манькавічы і даехаўшы да ракі Мядзелка вы знойдзеце акультураную палянку. Тут ваш галоўны арыенцір – драўляны масток, каля яго як раз і знаходзіцца той невялікі манькавіцкі вадаспад.
Калісьці тут стаяў вадзяны млынок, але пасля 50-ых гадоў, мінулага стагоддзя, яго разабралі на будаўнічыя матэрыялы.
А вось калі перайсці па мастку на супрацьлеглы бок і рухацца па сцяжынцы, то вы абавязкова адшукаеце і рэшткі капліцы Друцкіх-Любецкіх.
Пахавальня месціцца ў глыбіні лесу, таму калі адпраўляецеся ўлетку, то ўглядайцеся ўважліва (з-за дрэў знайсці месца можа быць крыху складана).
Друцкія-Любецкія валодалі Манькавічамі адносна і нядоўга: з 1887 года па 1910 год, але нават за гэты кароткі час паспелі абжыцца добрай гаспадаркай і перабудаваць старую сядзібу.
Сам сядзібны дом не захаваўся, ён быў разбураны ў першай палове 20-га стагоддзя.
Напачатку 2000-ых гадоў вакол капліцы стаялі будаўнічыя ўсходы, таму цалкам імаверна, што планавалася рэканструяваць гэты аб’ект. Мясціны тут сапраўды прыгожыя і безумоўна Манькавічы маюць турыстычны патэнцыял, але нешта не атрымалася, і ад гэтай ідэі вырашылі адмовіцца.
Сёння капліца Друцкіх-Любецкіх паўстае ў разбураным выглядзе: дах абрынаўся, сцены спісаны неразумнымі думкамі, а вакол ляжаць тыя самыя будаўнічыя ўсходы.
Дарэчы, у Віцебскай вобласці ёсць і іншая пахавальня гэтага роду, яна знаходзіцца ў вёсцы Казлоўшчына. На выездзе з Манькавічаў можна паглядзець Успенскую царкву 1871 года.
Ніжэй кропка з адзнакай капліцы на мапе:
Як дабрацца ў Манькавічы? З Мінска дарога зойме каля 2 гадзін і прыкладна 160 кіламетраў. Адзіны зручны варыянт – уласны аўтамабіль. Ехаць толькі дзеля гэтага месца не варта, уключыце ў свой маршрут яшчэ некалькі пунктаў. Напрыклад: Паставы, Камаі, Мядзел.
