Давыд-Гарадок размешчаны каля трасы Р88, паміж Столінам і Туравам. Са славутасцяў і цікавостак у горадзе хочацца вылучыць некалькі аб’ектаў: драўляную царкву 18 стагоддзя, касцёл, помнік князю Давыду і мураваны храм Казанскага абраза Маці Божай.
Старадаўняя царква Святога Георгія
Думаю што галоўны гістарычны аб’ект у Давыд-Гарадку – гэта драўляная Свята-Георгіеўская царква , якая верагодна пабудавана яшчэ ў 1724 годзе. Аднак некаторыя крыніцы мяркуюць, што храм можа быць значна старэйшым і адносіцца да другой паловы 17 стагоддзя.
У гэтым вонкава сціплым храме раней можна было ўбачыць найпрыгажэйшы драўляны разны іканастас, яго зрабілі яшчэ ў 1751 годзе (зараз ён у музеі).
Іканастас мае чатыры рады і некалькі жывапісных кампазіцый: “Хрыстос Пастар”, “Пейзаж з гарой” і “Архістратыг Міхаіл”. За савецкім часам гэтая царква ў Давыд-Гарадку была зачынена, а павернутая вернікам толькі на пачатку 90-ых, часткова адноўлена.
Апроч свайго вялікага ўзросту царква цікавая і нетыповай архітэктурай. Гэты храм добры прыклад драўлянага дойлідства, які ўяўляе сабой трохзрубны аб’ём з невялічкім бабінцам.
Кожная з 3 секцый накрыта чатырохсхільным дахам, які завяршаецца цыбульнай глаўкай. На царкоўнай тэрыторыі знаходзяцца старадаўнія могілкі і вежа-званіца. Гэта невялічкая званіца пабудавана на месцы старой у сярэдзіне 19 стагоддзя.
Царква стаіць недалёка ад цэнтру, калі заязджаць у горад з боку Альшан, то ваш арыенцір гэта скрыжаванне вуліц Кастрычніцкай, Савецкай і Астроўскага.
Помнік князю Давыду ў Столінскім раёне
Яшчэ адна цікавостка Давыд-Гарадка – гэта помнік князю Давыду Ігаравічу, які ўсталяваны каля мясцовага Дома Культуры. Лічыцца што менавіта гэты Валынскі і Дарагабужскі князь датычны да заснавання горада на гэтых землях.
Над праектам бронзавага помніка працавалі скульптар Аляксандр Дранец і архітэктар Леанід Левін. Урачыстае адкрыццё адбылося ў 2000 годзе і было прымеркавана да круглай даты горада – 900 гадоў з моманту заснавання.
Скульптура князя ўказвае дзідай у бок гарадзішча, дзе верагодна і пачынаўся Давыд-Гарадок. На помніке ёсць просты і лаканічны надпіс “Князь Давыд”. Помнік знаходзіцца бліжэй да цэнтру, адразу за ракой Гарынь.
Касцёл Божага Цела ў Давыд-Гарадку
Каталіцкі храм які можна ўбачыць у Давыд-Гарадку пабудавалі ў 1936 годзе, дзейнічаў прыход усяго некалькі гадоў, а затым зачынены.
Пасля вайны, савецкія ўлады прынялі рашэнне знесці званіцу, а будынак перарабіць у клуб (цэркваў ў горадзе і так хапала). Дом культуры размяшчаўся ў касцёле доўгіх 70 год, пакуль у 2017 годзе ўлады не прынялі рашэнне вярнуць храм каталікам. Будынак акультурылі, наколькі хапіла сродкаў, і зноў плануюць адкрыць для ўсіх ахвочых.
Першапачатковы варыянт касцёла меў рысы архітэктуры канструктывізма. Цікавостка знаходзіцца на вуліцы Лермантава 2.
Царква ў гонар Казанскага абраза Маці Божай
Казанская царква з’явілася ў 1913 годзе, будавалася на месцы папярэдніх храмаў. Па архітэктуры пабудова адносіцца да традыцыйных узораў псеўдарускага стылю. Вылучаецца сваім блякла-ружовым колерам (раней чырвоным), па-свойму нетыповым, бо большасць праваслаўных храмаў Палесся сінія і да таго ж выкананы ў асноўнай сваёй масе з дрэва.
Перад уваходам на тэрыторыю стаіць трох’ярусная брама, завершаная цыбульнай глаўкай.
З характэрнага можна адзначыць капліцу, размешчаную на рагу агароджы і якая стылістычна добра суадносіцца з царквой. Яна пабудавана, як і храм, у 1913 годзе.
Гэтая царква ў Давыд-Гарадку мае даволі стандартную структуру: прытвор, вежа-званіца і малітоўная зала, да якой прымыкаюць невялічкія паўкруглыя рызніцы.
Асноўны аб’ём храма завяршаецца традыцыйным цыбульнымі глаўкамі (іх усяго 5 + 1 на вежы + 2 на рызніцах + 1 на капліцы і не забываем тую што на браме). Ёсць даволі цікавы факт – царкву, як і сам Давыд-Гарадок, можна ўбачыць у фільме “Кветкі правінцыі” 1994 года.
Ніжэй кропка з адзнакай царквы Святога Георгія на мапе:
