Адна з даволі часта сустракаемых птушак Беларусі, асабліва ў лісцяных парках, – Папаўзень звычайны (Sitta europaea, рус – Поползень). Акрамя таго гэтую вёрткую птушку лёгка ўбачыць у іглічных лясах і нават гарадскіх садах.
Гэтая птушка невялікага памеру, каля 13-15 сантыметраў, з атрада вераб’інападобных. Вонкава лёгка пазнаецца і мае цікавую афарбоўку.
Верхняя частка цельца звычайна шэра-блакітная з рознымі адценнямі і адлівамі. Брушка – светлае, але ад месца да месца пражывання можа быць і насычана рудым. Дзюба даўгаватая, візуальна павялічваецца за кошт чорнай паласы, якая праходзіць праз вочы папаўзеня.
Адрозніць самца і самку папаўзеня – задача складаная, вонкава яны вельмі падобныя, а асноўнае адрозненне – памер (самец буйней).
У рацыёне ў папаўзеня як раслінная ежа, так і розныя казуркі. Заўважыць гэтую хуткую птушачку лягчэй за ўсё падчас таго як яна сілкуецца і хавае семечкі ў кары дрэў.
Папаўзні шумныя і галасістыя, а спектр іх “спеваў” досыць шырокі. Акрамя таго птушка своеасаблівы “гімнаст” – можа звісаць уніз галавой і хутка перасоўвацца па дрэвах (гэтым яна трохі падобная на пішчуху). Для пражывання аддае перавагу дуплам, але свае не робіць, выкарыстоўвае дзятлаўскія, альбо розныя адтуліны ў дрэвах.
У Беларусі папаўзень застаецца на зімоўку і не ляціць у вырай, таму ўбачыць яго можна круглы год.
