У Бярэзінскім раёне, Мінскай вобласці, ёсць невялічкі аграгарадок Багушэвічы, які згадваецца ў летапісах яшчэ ў пачатку 16 стагоддзя. За такую доўгую гісторыю мястэчка было ва ўласнасці Завішаў, Ваньковічаў і Свентаржэцкіх. Пры апошніх на беразе ракі Уса быў пабудаваны касцёл Божага Цела.
Але па праўдзе першапачаткова гэты храм будаваўся як пахавальня роду Свентаржэцкіх, – гэта добра тлумачыць яго даволі незвычайную архітэктуру. Шасцігранны храм з пінаклямі звонку сапраўды хутчэй нагадвае капліцу, чым касцёл.
Таксама цікавы факт, што дакладная дата будаўніцтва гэтага храма ў Багушэвічах невядомая, але большасць крыніц згадваюць сярэдзіну 19 стагоддзя.
Былая пахавальня мае ярка выяўленую неагатычную архітэктуру, а сам будынак выкананы ў форме шасцікантовіка які быццам бы імкнецца да ратонды (з вышыні ствараецца менавіта такое ўразанне).
Ёсць цікавае меркаванне, што будаўніцтва вялося па праекце архітэктара Якуба Кубіцкага. Пахавальня размяшчалася побач з сядзібай Свентаржэцкіх, якія цалкам магчыма і звярнуліся да вядомага польскага архітэктара. Аднак ён у асноўным працаваў са стылем класіцызм і больш з праектамі палацаў. Да таго ж памёр у 1833 годзе, на той момант, верагодна, яшчэ не пачаліся работы па ўзвядзенні гэтага касцёла.
Пасля паразы паўстання 1863 года сядзібны комплекс Свентаржэцкіх спалілі за актыўны ўдзел і падтрымку паўстанцаў. Пахавальню разбураць не сталі, а перадалі ва ўлонне праваслаўнай царквы.
У 1869 годзе храм пераасвяцілі, але перабудоўваць будынак па ўсёй верагоднасці не сталі. Праз 50 гадоў, у 1919 годзе, Свята-Даніілаўская царква была вернута каталікам.
У гады савецкіх рэлігійных ганенняў касцёл не пацярпеў, але службы ў ім не вяліся – храм выкарыстоўвалі як склад, а пазней пад мясцовы клуб. Але праз нейкі час будынак наўпрост закінулі. Багушэвіцкі касцёл пачаў пуставаць, пакуль у яго сценах не здарыўся пажар. Адбылася гэтая сумная падзея ў 1989 годзе. Першыя спробы аднавіць гэты прыгожы касцёл былі зроблены ў 2000 годзе. Часткова рэканструявана цэнтральная вежа, атынкаваны сцены, адноўлены элементы дэкору. Інтэр’ер храма выглядае хоць і проста, але даволі ўтульна.
Дабрацца да гэтай славутасці Беларусі можна па трасе M4 (Мінск-Магілёў) і праехаўшы ад яе ўсяго толькі 10 кіламетраў па дарозе Н800. Наведаць касцёл Божага Цела ў аграгарадку Багушэвічы дакладна варта, ніжэй кропка на мапе:
Калі вы цікавіцеся занядбанымі гістарычнымі будынкамі, можаце таксама заехаць у вёску Раванічы. Там убачыце руіны касцёла Святога Антонія і сядзібу Слатвінскіх. У горадзе Беразіно можна паглядзець на стары палац графа Патоцкага.
