Крывічы – даволі распаўсюджаная назва населеных пунктаў на тэрыторыі Беларусі. У гэтым артыкуле размова пойдзе пра гарадскі пасёлак у Мядзельскім раёне. Самай цікавай, але не адзінай, славутасцю ў Крывічах лічыцца касцёл Святога апостала Андрэя і кляштар ордэна трынітарыяў.
Прыехаўшы ў туманны будні дзень у мяне на жаль не атрымалася патрапіць на тэрыторыю гэтага храмавага комплексу. Таму большасць здымкаў зроблена з паветра (2019 год).
Гісторыя кляштара і самаго касцёла пачынаюцца ў 1770 годзе, калі гэтыя землі належалі. Андрэю Укольскаму. Менавіта ён выдаў дазвольную грамату (фундуш) на падмурак і будаўніцтва кляштара трынітарыяў у Крывічах. Крывіцкі кляштар стаў пятым прыстанкам манахаў-трынітарыяў на тэрыторыі Беларусі (на той момант ужо былі храмы ў Оршы, Віцебску, Маладзечна і Брэсце).
Першы будынак храма быў драўляны, але ўжо ў 1796 годзе скончаны сучасны мураваны касцёл.
Архітэктура гэтага касцёла даволі незвычайная, яе можна аднесці да стылю позняга барока. Фасад з’яўляецца часткай высокай трох’яруснай вежы-званіцы. Збоку да касцёла прымыкае частка жылога корпуса кляштара трынітарыяў.
А хто гэта такія манахі-трынітарыі? Старадаўні манаскі ордэн, родам з Францыі, які быў заснаваны ў далёкім 1198 годзе. Асноўная мэта манахаў – выкуп захопленых хрысціян з палону. У родных землях трынітарыяў часта звалі – “братамі аслоў” або “асліным ордэнам”. Гэта было звязана з тым, што манахам забаранялася перасоўвацца на канях (толькі на мулах і аслах) ажно да 13 стагоддзі.
У 1832 годзе, пасля падаўлення вызваленчага паўстання, закрываюць кляштар трынітарыяў у Крывічах, а іхні касцёл становіцца звычайным парафіяльным.
Напачатку 20 стагоддзя вакол храма будуюць масіўную агароджу з бутавага каменю, а таксама ўзводзяць трохарачную браму з цэглы.
За савецкім часам касцёл доўга пуставаў, але цалкам імаверна, што не зачыняўся. На мяжы 2000-ых прайшла грунтоўная рэканструкцыя, але частка даху так і засталася бляшанай.
Ніжэй кропка з адзнакай гэтай цікавосткі на мапе:
Калі будзеце ў Крывічах, паглядзіце і Траецкую царкву, якая знаходзіцца крыху далей па галоўнай вуліцы. У Мядзельскім рэгіёне раю таксама зазірнуць у Касцяневічы.
