Капліца-пахавальня ў вёсцы Гайцюнішкі, Воранаўскага раёна, была пабудавана ў пачатку 17 стагоддзя, па загадзе тагачаснага ўладальніка мястэчка – Пятра Нонхарта. Размяшчалася недалёка ад фамільнага дома-крэпасці, але на жаль, сёння можна ўбачыць толькі ейныя рэшткі.
Цалкам імаверна, што гэты масіўны будынак першапачаткова будаваўся як кальвінскі збор. Па вонкавым выглядзе ён чымсьці нагадвае абарончае збудаванне, ці нават невялікую крэпасць.
У сваёй архітэктуры, гэта дзіўная пабудова спалучала такую бурную сумесь з готыкі, рэнесансу і элементаў ранняга барока.
Па форме каплічка прамавугольная, памерамі каля 18 на 7 метраў. На старых здымках добра бачны ўмацаваныя контрфорсамі сцены.
За сваю доўгую гісторыю капліца стала месцам спачыну для прадстаўнікоў некалькіх шляхетных родаў: Храптовічаў, Шэметаў, Шрэтэраў, Путткамераў і канешне Нонхартаў.
Капліца паспела пабываць не толькі лютэранскай царквой, але і касцёлам. У сярэдзіне 20 стагоддзя гэты храм быў моцна пашкоджаны і ўжо да нас дайшоў у выглядзе развалін пасярод гаспадарчага поля.
На ніжнім фота можна паглядзець як пахавальня Нонхартаў выглядала ў лепшыя гады:
Калі ехаць ад аграгарадка Беняконі, то руіны капліцы будуць справа. Пасля павароту на псіхіятрычную бальніцу літаральна пару хвілін язды, ніжэй кропка на мапе:
Што яшчэ цікавага паглядзець у гэтым рэгіёне? Калі адправіцца па дарозе ўздоўж мяжы, то патрапіце ў вёску Геранёны, дзе можна ўбачыць замчышча Гаштольдаў і Мікалаеўскі касцёл 16 стагоддзя.
