Бешанковічы – даволі буйны гарадскі пасёлак у Віцебскай вобласці, размешчаны на рацэ Заходняя Дзвіна. Месца цікавае з пункту гледжання гісторыі і славутасцяў. Напрыклад у пасёлку захавалася царква прарока Святога Ільі сярэдзіны 19 стагоддзя, акрамя таго тут ёсць пантонны мост і нават будынак старога палаца Сапегаў (а гэта заўважце другая палова 17 стагоддзя). Да роду Храптовічаў Бешанковічы перайшлі ад Агінскіх у 1783 годзе. Яны ж і сталі апошнімі ўладальнікамі, менавіта таму мноства будынкаў у Бешанковічах звязана з іх прозвішчам, у тым ліку і будынак палаца ў цэнтры.
Палац Храптовічаў у Бешанковічах: гісторыя і апісанне
Дакладная дата будаўніцтва палаца невядомая, але імаверна – гэта канец 18 стагоддзя. У той перыяд Бешанковічы яшчэ не належалі Храптовічам, так што верагодней за ўсё будаўніцтвам сядзібы займаліся прадстаўнікі роду Агінскіх.
Па мерках розных палацаў Беларусі, маёнтак Храптовічаў выглядае даволі так сціпла. Па архітэктуры – будынак прыклад ранняга класіцызму, аднак што цікава – без тыповага порціка. Палац каменны, складаўся з 3-х карпусоў, якія ўтвараюць сядзібна-паркавы ансамбль у форме літары П.
Бакавыя аднапавярховыя флігелі выкарыстоўваліся пад жыллё для прыслугі і гасцей. Цэнтральны двухпавярховы корпус – пад гаспадарскія пакоі і залы для прыёмаў.
Адзін з найбольш яркіх элементаў сядзібы Храптовічаў – каваны балкон, выкананы ў стылі ампір.
Дарэчы, звярніце ўвагу і на невялічкія скульптурныя выявы толі Сфінкса, ці то фараона.
Цікавы факт: у сядзібе Храптовічаў у 1812 годзе, на 3 дні, спыняўся Напалеон Банапарт. Да 2012 года, у Бешанковічах існаваў вялізны 400-гадовы дуб яго імя (помнік прыроды). Пад якім нават была напісана карціна з французскім імператарам. Наведваў палац у Бешанковічах і расейскі імператар Аляксандр I.
Сумныя часы для Храптовічаў наступілі ў пачатку 20 стагоддзя. У 1918 годзе, сядзібу разрабавалі, а ў сценах будынка размясціўся вайсковы полк. За савецкім часам будынак палаца выкарыстоўвалі пад розныя адміністрацыйныя патрэбы, зараз тут размяшчаецца дзіцячая мастацкая школа.
Знайсці гэтую цікавостку будзе даволі проста – адпраўляйцеся на вуліцу Камуністычная, бліжэй да парку, ніжэй кропка на мапе:
Недалёка ад Бешанковіч рэкамендую паглядзець храм у вёсцы Свяча і занядбаны храм у Слабодцы.
