Баранавічы – можна назваць даволі маладым горадам Беларусі. Сваю афіцыйную гісторыю вядзе з 1871 года і больш за ўсё вядомы як буйны чыгуначны вузел краіны. Славутасцяў і цікавостак у горадзе хапае, але сапраўды яркіх і запамінальных няшмат. Адзін з такіх аб’ектаў – драўляны касцёл Узвіжання Святога Крыжа першай паловы 20 стагоддзі.
Крыжаўзвіжанскі касцёл збудаваны ў 1924 годзе. Архітэктура храма вельмі незвычайная, бо тут ёсць элементы як барока, так і класіцызму, і нават неаготыкі.
Па форме пабудова прастакутная, візуальна падзеленая на 2 узроўня. У дах, над фасадам, убудавана фігурная вежка са шпілем.
Уваход у баранавіцкі касцёл упрыгожаны порцікам на дзвюх калонах. Асаблівую ўвагу прыцягвае сімвал “усёбачнага вока”, у разрэзе хрысціянства ён азначае знак Святой Тройцы.
Цікава што першапачаткова да храма была прыбудавана толькі адна кантаваная сакрыстыя (тая якая са створкай). Затым у нейкі момант дабудавалі яшчэ адну сакрыстыю, якая ўжо дадала будынку сіметрыю.
Перад уваходам у касцёл пабудавана трохарачная брама з каменя ў неагатычным стылі.
Храм знаходзіцца ў цэнтры Баранавіч, па суседстве з праваслаўным саборам, на вуліцы Куйбышава, 36.
У Баранавічах можна паглядзець яшчэ некалькі гістарычных будынкаў, вартых увагі: сядзіба Каралеўскіх, былая сінагога, акцызнае ўпраўленне.
