Юравічы – гэта вельмі цікавае і дакладна старое мястэчка, тут нават ёсць гарадзішча 11 стагоддзя. А яшчэ лічыцца што прыблізна 26000 гадоў таму, на месцы гэтага гарадзішча якраз была стаянка першабытнага чалавека, дарэчы, адна з двух самых старажытных на тэрыторыі сучаснай Беларусі. Але і на гэтым не ўсё! У Юравічах знаходзіцца адзін з самых масіўных манастыроў Гомельскай вобласці – былы касцёл, калегіум і кляштар езуітаў сёння цалкам рэканструяваны і дзейнічае як праваслаўная царква з мужчынскім манастыром у складзе.
Сёння Юравічы даволі невялікая вёска, якая размяшчаецца дзесьці паміж Мазыром і горадам Хойнікі. Вядома, што манахі ордэна езуітаў заснавалі тут свой кляштар у 17 стагоддзі. Першыя будынкі, як гэта часта бывала, збудавалі з дрэва і таму прастаялі яны зусім нядоўга.
Напачатку 18 стагоддзі моцны пажар зруйнаваў амаль увесь кляштар, таму манахі вырашалі адбудаваць новыя будынкі, ужо з камянёў і цэглы. Дамінантай усяго комплексу з’яўляўся масіўны і прыгожы касцёл Нараджэння Найсвяцейшай Дзевы Марыі.
Гэты храм датуецца 1746 годам, ён будаваўся на працягу 20 гадоў. З 1778 у Юравічах размясціўся калегіум ордэна езуітаў, які дзейнічаў да 1820 года. Што даволі нетыповы, пасля 20 года ўвесь комплекс адышоў да мазырскіх айцоў-бернардынцаў. Тыя манахі былі актыўныя і дзейныя, падтрымалі паўстанні 1830 года, за што кляштар у Юравічах закрылі. Аднак сам ордэн не толькі не ліквідавалі, але ён нават аднавіў сваю працу ў 1841 годзе.
Сітуацыя кардынальна змянілася пасля паўстання 1863 года, якое паставіла крыж на каталіцкім кляштары. Нягледзячы на тое, што манахі не бралі ўдзел у новых выступах паўстанцаў, рускія ўлады вырашылі яго закрыць. Касцёл і жылыя карпусы перададзены праваслаўнай царкве. З гэтага моманту пачынаецца новая гісторыя мястэчка Юравічы.
Стары касцёл у 1865 годзе пераасвяцілі як царкву Раства Багародзіцы, а ў келлях манахаў-езуітаў размясцілася жаночае праваслаўнае манаства. Крыху пазней пачынаецца перабудова храма. Высокі трохнефны касцёл з дзвюма вежамі, абрастае цыбульнымі купаламі, па канонах праваслаўнай архітэктуры.
У перыяд актыўнай антырэлігійнай барацьбы праваслаўны манастыр і царкву ў Юравічах закрываюць. З 1950 года будынкі комплексу прыстасавалі пад патрэбы дзіцячага дома, а ўсе каштоўнасці былі вывезены.
Цалкам імаверна, што ідэя з дзіцячым домам не была рэалізавана ў поўнай меры. Таму па выніку былы манастыр доўгія гады стаяў напаўзакінутым. Яго нават пакрысе спрабавалі разбіраць на цэглу.
У 1993 годзе храм вернуты праваслаўны вернікам і пачалася яго рэканструкцыя, якая расцягнулася на дзесяцігоддзі.
На чэрвень 2025 года, царква ў Юравічах цалкам адноўлена. Мусіць яшчэ год ці два і магчыма скончаць манастырскія карпусы. Знайсці гэтую цікавостку Беларускі будзе нескладана, з’язджайце з трасы Р35 і рухайцеся ў цэнтр вёскі, ніжэй адзнака з кропкай на мапе:
Недалёка ад Юравічаў можна наведаць унікальную сядзібу ў Барысаўшчыне.
