На перадапошніх выходных ліпеня адбыўся штогадовы фестываль сярэднявечнай культуры - "Наш Грунвальд 2023", на хвіліначку ўжо 14-ы раз. Акрамя традыцыйнага і бадай што галоўнага відовішча фестывалю – рэканструкцыі эпізоду адной з найбуйнейшых бітваў Еўропы, гледачоў чакаў канцэрт “Пір пасля бітвы”, фаер шоу, мноства тэматычных зон і забаў. Ну і вядома поўнае адчуванне сярэднявечнай атмасферы з рыцарскімі баямі, конным турнірам, бугуртамі, музыкай і ежай. Паспець паглядзець усю запланаваную праграму - місія амаль невыканальная або прынамсі вельмі складаная. Таму Грунвальдскі фэст доўжыцца 2 дні, у гэтай фота-справаздачы здымкі з першага.
У другой палове дня ў Дудуткі зазірнуў няпрошаны госць у выглядзе дажджу, гледачоў па ўсёй бачнасці ён асабліва не збянтэжыў, а ўдзельнікі магчыма толькі і радыя яму былі.
Рэканструкцыя Грунвальдскай бітвы прайшла без адхіленняў ад сцэнара, а вынік застаўся такім жа, як і ў сапраўднай бітве 600 гадоў таму. Армія саюзнікаў (ВКЛ і Польскае каралеўства) разграміла войска Тэўтонскага ордэна.
Пасля завяршэння асноўнага блока (турніры і рэканструкцыя) гледачоў чакалі імпрэзы ад танцавальных калектываў і яркае фаер шоу.
А завяршаўся першы дзень фестывалю выступам музычных калектываў: Стокс, Вока Чарота, КАS, Nevrida, Племя, Рокаш, Sailor Pigs і канешне Іван Кірчук.