Адзін з найстарэйшых гарадоў на тэрыторыі Беларусі - Тураў, багаты на гісторыю і падзеі. У горадзе ёсць некалькі цікавых турыстычных аб'ектаў, сярод якіх галоўнае месца займае Тураўскае гарадзішча "Замкавая гара". Тут размяшчаецца музейны комплекс з руінамі царквы 12 стагоддзя і помнік Кірылу Тураўскаму. Патрапіць у гісторыка-археалагічны комплекс "Старажытны Тураў" можа любы ахвочы на платнай аснове (уваходны квіток - 2 рублі).
Унутры шатра можна ўбачыць падмурак каменнага храма, які па здагадках гісторыкаў не саступаў Сафійскаму сабору ў Полацку. Дзіўна гучыць і магчымая прычына разбурэння гэтай царквы - водгаласы землятрусу ў Карпатах.
Сярод экспанатаў музея ёсць і макет Турава з візуалізацыяй горада ўзору 12 стагоддзя. Тут увагу прыцягвае не толькі царква, але і мураваная вежа.
Экспазіцыя ў Тураве - сапраўды цікавая. Калекцыя стала фармавацца ў пасляваенныя гады, незвычайных і старадаўніх рэчаў тут хапае. Напрыклад вось такі саркафаг з рэдкага і дарагога каменя цёмна-ружовага колеру, такія пахаванні сведчаць аб высокім статусе памерлага.
На сценах мноства ілюстрацый і карцін з выявамі Турава, якія дапамагаюць лепш уявіць як выглядаў гэты горад у перыяд свайго росквіту.
Археалагічныя раскопкі і даследаванні гарадзішча праводзіліся ў 60-ыя гады, тады ж і былі знойдзены руіны старажытнай царквы.
Перад уваходам у музей стаіць 7-метровы помнік Кірылу Тураўскаму. Яго ўсталявалі 11 траўня 1993 года, выкананы па праекту архітэктара Мікалая Лук'янчыка, а саму скульптуру зрабіў Міхаіл Інькоў.
Ніжэй кропка з адзнакай месца, дзе знаходзіцца Тураўскае гарадзішча:
У горадзе рэкамендую таксама паглядзець драўляную царкву Усіх Святых і каменныя крыжы.
