У цэнтральнай частцы горада Мінску ёсць невялікая вуліца Мяснікова, якая цікава будынкам з верагодна самым, ну ці адным з самых, прыгожых балконаў горада. Дом будаваўся як прыбытковы і скончаны да 1903 года (вуліца Мяснікова ў той час называлася Навамаскоўскай).
Першымі ўладальнікамі будынка лічацца Веньямін і Пэрла Полякавы. Аднак неўзабаве нерухомасць перайшла да “Яўрэйскага цэнтральнага дабрачыннага таварыства” і амаль адразу тут размясцілася жаночае яўрэйскае вучылішча.
Пасля Кастрычніцкай рэвалюцыі і да 1939 года на трэцім паверсе (мансардным) жыў пісьменнік Іван Міхайлавіч Фёдараў, які пасля возьме псеўданім Янка Маўр. Напэўна малады настаўнік раніцай выходзіў на той самы цыбульны балкон і працаваў над сваімі будучымі творамі.
Падчас вайны гэты прыбытковы дом быў грунтоўна разбураны, на старым здымку бачна што на месцы балкона пустата.
У канцы 40-ых будынак аддалі пад жыллё для супрацоўнікаў інстытута, вядома папярэдне цалкам аднавіўшы (здымак ніжэй).
Вонкавае аблічча, якое дом мае цяпер, з'явілася ўжо пасля капітальнай перабудовы, якая скончылася ў 1998 годзе. Тады былі дабудаваны яшчэ 2 паверхі, праўда сваёй архітэктурай яны кардынальна адрозніваюцца ад першых.
Галоўнае ўпрыгожванні дома - гэта цыбульны балкон, які цудам перажыў рэканструкцыю і стаў своеасаблівай візітнай карткай вуліцы Мяснікова.
Знайсці гэтую гарадскую славутасць не складзе вялікай працы: ад касцёла святых Алены і Сімяона трэба прайсці некалькі хвілін па вуліцы Савецкай.
Паглядзіце таксама месцы, дзе знаходзілася першая электрастанцыя ў Мінску.