Прымежны аграгарадок Друя – гэта сапраўдная скарбніца для аматараў паездак па Беларусі. Нягледзячы на свае кампактныя памеры, месца багата на гісторыю і славутасці. Праўда варта адразу адзначыць, што пасля разбурэнняў 20 стагоддзя, шматлікія аб'екты дайшлі да нас у руінаваным выглядзе. Так напрыклад стала і з Петрапаўлаўскай царквой, канца 18 стагоддзя, пра якую нагадваюць толькі руіны вежы-званіцы.
Першапачаткова гэты храм будаваўся як уніяцкі і ў сваёй архітэктуры меў яркія рысы стылю позняга барока, дзе дамінантай выступала двух'ярусная вежа. Менавіта яе разваліны можна ўбачыць сёння.
Пасля таго як уніяцтва было ліквідавана, будынак аддалі праваслаўнай парафіі. Верагодна, у той перыяд храм часткова перабудавалі, бо на старых здымках першай паловы 20 стагоддзя відаць, што амаль увесь аб'ём царквы складае званіца.
Падчас Другой сусветнай вайны пабудова часткова разбурана, пасля чаго ўжо больш не выкарыстоўвалася. З часам ад вежы-званіцы засталіся толькі руіны сцен.
На двух здымках ніжэй, зробленых да 1939 года, можна ўбачыць, як размяшчаўся ўваход у вежу і дзе праходзіла вуліца.
Прыкладна ў 2015 годзе ля сцен былой царквы святых Пятра і Паўла з'явіліся будаўнічыя лясы і надзея на кансервацыю. Нажаль працы так і не былі пачаты.
У савецкі час амаль ушчыльную да вежы прыбудавалі цагляную адрыну. Па іроніі, дамы да якіх адносяцца гэтыя складскія памяшканні ўжо закінуты.
Руіны царквы знаходзяцца на вуліцы Чыгуначная, амаль у самым цэнтры Друі. Ніжэй адзнака з размяшчэннем на мапе:
Галоўная і самая цікавая славутасць аграгарадка - гэта ўнікальны Траецкі касцёл з корпусам кляштара бернардынцаў. Па шляху ў Друю раю заехаць у Ідолту, дзе можна паглядзець капліцу-пахавальню Мілашаў и незвычайны касцёл.
