У Гродне можна паглядзець адні са старэйшых каталіцкіх могілак Беларусі, утвораные ў апошнія гады існавання Рэчы Паспалітай – у 1792 годзе. Крыху пазней, у 1822 годзе, у цэнтры Фарных могілак на грошы нейкага Студніцкага пабудавана невялікая капліца па праекце архітэктара Карла Багімеле (ён жа выканаў праект Гродзенскай ратушы).
На гэтых могілках пахаваны многія прадстаўнікі гарадзенскай інтэлегенцыі 19 стагоддзя (хоць сустракаюцца як больш раннія, так і пазнейшыя магілы).
Тут пахавана вядомая пісьменніца Эліза Ажэшка са сваім мужам Станіславам Нагорскім.
На гэтых могілках ёсць магіла архітэктара Джузепе Сака, які вызначыўся шматлікімі праектамі ў Гродне (у тым ліку на яго рахунку рэканструкцыя Каралеўскага замка, будаўніцтва палаца Станіславава і сядзібы Тызенгаўза). Тут жа пахаваны Баляслаў Шышкевіч, – майстар і скульптар які выканаў мноства надмагільных помнікаў, размешчаных у тым ліку і на гэтым некропалі.
Могілкавую капліцу перабудавалі на пачатку 20 стагоддзя. У 1907 годзе была дабудавана невялічкая вежа-званіца, якая да класічнай архітэктуры дадала ноты неаготыкі.
Вядома такія старыя могілкі проста не маглі не абрасці рознымі чуткамі і легендамі: тут і чарговая неспакойная панна, якая блукае ў белых адзеннях, старая што ператвараецца ў крумкача, ваяры якія ўстаюць з магіл. І гэта толькі малая частка такіх гісторый.
На ўскраіне могілак відаць яшчэ адзін таямнічы, але ўжо сучасны, аб'ект – гродзенскі «Замак Дракулы». Насамрэч ніякай містыкі ў ім няма. Дом - звычайны катэдж з 90-ых, які будавалі з размахам, але так і не змаглі скончыць.
Акрамя незвычайнай архітэктуры і даволі дзіўнага месцазнаходжання, дом валодае тытулам самага высокага прыватнага дома ў Беларусі.
Знайсці Фарныя могілкі можна на скрыжаванні вуліц Падольнай і Прыгараднай, ніжэй кропка з размяшчэннем на мапе:
Па суседстве з каталіцкай часткай могілак ёсць яшчэ праваслаўныя, якія таксама раю паглядзець.
