Манькавічы - гэта невялічкая вёска Віцебскай вобласці, Пастаўскага раёна. Для аматараў падарожжаў па Беларусі знойдзецца некалькі цікавых аб'ектаў: рукатворны вадаспад, царква і руіны капліцы. Калісьці тут была і сядзіба Друцкіх-Любецкіх, аднак да нашых дзён яна не захавалася.
Праехаўшы праз усю вёску Манькавічы і даехаўшы да ракі Мядзелка вы знойдзеце акультураную палянку.
Ваш арыенцір - драўляны мост, каля яго як раз і знаходзіцца невялікі манькавіцкі вадаспад.
Калісьці тут стаяў вадзяны млын, але пасля 50-ых гадоў, мінулага стагоддзя, яго разабралі на будматэрыялы.
Калі перайсці праз гэты мост на супрацьлеглы бок і рухацца па сцяжынцы, то натыкнецеся на руіны капліцы Друцкіх-Любецкіх.
Пахавальня ў глыбіні лесу, таму калі адпраўляецеся ўлетку, то ўглядайцеся ўважліва (з-за дрэў знайсці месца складана).
Друцкія-Любецкія валодалі Маньковічамі адносна нядоўга з 1887 года па 1910 год, але за гэты кароткі час паспелі абжыцца гаспадаркай і перабудаваць сядзібу.
Сам сядзібны дом не захаваўся і быў разбураны ў першай палове 20-га стагоддзя.
У пачатку 2000-ых гадоў вакол капліцы стаялі будаўнічыя лясы - верагодна планавалася рэканструяваць гэты аб'ект.
Месцы тут сапраўды прыгожыя і маюць турыстычны патэнцыял, але нешта не зраслося, і ад гэтай ідэі вырашылі адмовіцца.
Сёння капліца Друцкіх-Любецкіх паўстае ў разбураным выглядзе: дах абваліўся, сцены спісаны неразумнымі думкамі, а вакол ляжаць тыя самыя буд-лясы.
Дарэчы ў Віцебскай вобласці ёсць і іншая пахавальня гэтага роду, якая знаходзіцца ў вёсцы Казлоўшчына.
На выездзе з Манькавічаў можна паглядзець Успенскую царкву 1871 года.
Як дабрацца ў Манькавічы? З Мінску дарога зойме каля 2 гадзін і 160 кіламетраў. Адзіны зручны варыянт - уласны аўтамабіль. Ехаць толькі дзеля гэтага месца не варта, уключыце ў свой маршрут яшчэ некалькі прыпынкаў. Напрыклад: Паставы, Камаі, Мядзел.
Як звычайна, больш славутасцяў ў нас на мапе.
Варта заязджаць ці месца таго не варта?
варта