Неагатычны касцёл у Мсцібава

За некалькі кіламетраў ад Ваўкавыска можна ўбачыць касцёл святога Яна Хрысціцеля, які знаходзіцца ў вёсцы Мсцібава. Гэты храм пабудаваны напачатку 20 стагоддзі, на месцы драўлянага папярэдніка. Па сваёй архітэктуры ён адносіцца да стылю неаготыка, які асабліва быў папулярны ў той час, калі будаваўся касцёл.

Акрамя самога храма звярнуць увагу варта і на цікавую браму-званіцу, якая выканана з жоўтай цэглы.

Даволі цікавы факт: вежа старэйшая за касцёл і датуецца 1900 годам.

Лічыцца, што каталіцкая парафія ўтворана ў Мсцібава яшчэ ў канцы 15 стагоддзя, у некаторых крыніцах сустракаецца і іншы варыянт, – 1512 год.

А першы драўляны храм пабудавалі ў 1529 годзе. Аднак як і наступныя будынкі, ён згарэў падчас адной са шматлікіх войн, якія прайшлі па нашых землях.

Той касцёл які мы можам убачыць сёння, пачалі ўзводзіць на грошы прыхаджан у ліпені 1910 года. Скончыць работы змаглі толькі праз 12 гадоў, калі вёска Мсцібава была ў складзе Міжваеннай Польшчы.

Унутры касцёл святога Яна Хрысціцеля падзелены на тры нефы.

Цэнтральнае месца ў інтэр'еры займае неагатычны двух'ярусны алтар Божай Маці.

Тры астатнія алтары значна старэйшыя і перанесены яшчэ са старога драўлянага храма.

Над нартэксам размяшчаецца орган.

Вонкава касцёл сапраўды ўражвае: складаны скатны дах, высокія двух'ярусныя вежы, контрфорсы па перыметры будынка, арачныя выцягнутыя вокны і мноства дэталяў, якія заўважаеш толькі шпацыруючы па тэрыторыі.

Да прыкладу: да правай сакрыстыі прымыкае незвычайная круглая вежка, прызначэнні якой адразу і незразумела.

Цэнтральны фасад не менш цікавы, тут над уваходам трохкутны шатровы шчыт, які выступае за асноўны аб'ём. Яго з нацяжкай нават можна назваць своеасаблівым вімпергам, вялізнага памеру.

Архітэктура вежы-брамы недзе дысгармануе з касцёлам, перацягваючы ўвагу на сябе.

Звон, які размяшчаецца на верхнім ярусе, носіць імя “святы Ян Хрысціцель“. Яго на свае грошы замовіў ксёндз Марк Бурак, якога фашысцкія акупанты расстралялі ў 1943 годзе ў храме.

За касцёлам ёсць невялікая цагляная пабудова - гэта касцяніца, збудаваная таксама ў пачатку 20 стагоддзя.

Касцёл размешчаны ў самым цэнтры Мсцібава, ад трасы Р99 пару хвілін язды. На мапе адзначаны пункт з каардынатамі.

Ваўкавыскі раён багаты на гістарычныя помнікі. Калі будзеце ў гэтых краях, то варта наведаць храм у Шылавічах і старадаўні касцёл у Гнезна.