У аграгарадку Празарокі, Глыбоцкага раёна, знаходзіцца масіўны касцёл неараманскай архітэктуры. Гэты храм будаваўся на месцы драўлянага папярэдніка, які згарэў у пажары ў канцы 19 стагоддзя.
Гісторыя каталіцкай парафіі на гэтых землях пачалася яшчэ ў 1698 годзе, калі быў пабудаваны першы касцёл. Тады Празарокі належалі Юстыніяну Шчыту і верагодна пры яго падтрымцы вяліся будаўнічыя працы.
У Празароках дзейнічаў францысканскі кляштар, прымусова закрыты пасля паражэння паўстання 1830 года.
Цагляны касцёл Унебаўзяцця Найсвяцейшай Дзевы Марыі пачалі будаваць у 1899 годзе. Работы скончылі праз 8 гадоў, а ў кастрычніку 1907 года храм урачыста асвячоны.
Сваімі памерамі пабудова сапраўды здзіўляе. Вылучаюцца квадратныя вежы ў некалькі ярусаў з арачнымі вокнамі і ўвянчаныя шатровымі завяршэннямі. Храм накрыты двухсхільным вальмавым дахам і мае 3 нефы. Сцены і фасад без асаблівых дэкаратыўных вынаходстваў.
Перад уваходам на тэрыторыю ўсталявана невялічкая кованая брама, хутчэй за ўсё на пачатку 90-ых.
Пасля заканчэння Другой сусветнай вайны касцёл зачынілі. З 1950 года будынак храма выкарыстоўвалі як збожжасховішча.
Пасля распаду СССР касцёл у вёсцы Празарокі вернуты вернікам і амаль адразу пачаліся рэстаўрацыйныя працы. Сёння храм дзейны і адкрыты для ўсіх жадаючых. Знаходзіцца ў самым цэнтры аграгарадка і яго добра відаць яшчэ на пад'ездзе.
У Празароках захавалася і праваслаўная царква, а недалёка ад гэтых мясцін можна паглядзець на адзіную пячору ў Беларусі.
