Навагрудак – адзін з найважнейшых гарадоў у гісторыі нашай краіны і ВКЛ у цэлым. Таму кожная славутасць у гэтым горадзе па-свойму асаблівая і вартая ўвагі. Пасля наведвання руін замка настойліва рэкамендую паглядзець фарны касцёл Праабражэння Гасподняга. Першапачаткова гэты храм меў гатычныя рысы архітэктуры, а яго гісторыя бярэ пачатак яшчэ ў 1395 годзе. Ёсць нават легенда-здагадка, што да будаўніцтва касцёла датычны вялікі князь Вітаўт, а месца для ўзвядзення храма ён абраў на старадаўнім паганскім капішчы.
У пачатку 18 стагоддзя пачынаюцца маштабныя работы па перабудове наваградскага касцёла ў стылі сармацкага барока, з-за чаго ў яго архітэктуры пераплятаюцца элементы розных эпох. Дакладная дата будаўніцтва невядомая. Лічыцца, што сучасны храм узведзены на месцы папярэдніка ў перыяд з 1712 па 1726 гады.
Архітэктура касцёла дастаткова строгая, у ёй выдатна праглядаецца шматвяковая гісторыя. Галоўны фасад вылучаны трохкутным франтонам, які ўзвышаецца над двух'яруснымі чацвярціковымі вежамі.
Унутраная прастора мае толькі адну нава, а сам храм завяршаецца паўкруглай апсідай. У архітэктуры вылучаюцца капліцы, размешчаныя з левага боку. Паміж сабой адрозніваюцца памерамі і формамі, арыентаваны ў розныя бакі свету, а таксама пабудаваны ў гонар розных святых.
У капліцы Цела Гасподняга размешчана мемарыяльная пліта з чорнага мармуру:
У Хоцінскай бітве 1621 года прымаў удзел конны полк, які складаўся з 720 вершнікаў. Камандаваў імі кашталян Ян Рудамін. Лічыцца, што менавіта ўмяшанне гэтага палка ў бітву, павярнула ход усяго змагання.
крыніца : Глобус Беларусі
Менавіта ў гонар свайго брата і суседзяў, якія ваявалі супраць туркаў, усталявалі мемарыяльную пліту. У цэнтры знаходзіцца барэльеф, які паказвае 9 фігур і самога Яна Рудаміна, знізу - зрынутыя ворагі, а зверху - Божая Маці з дзіцем.
У 1857 годзе Фарны касцёл Навагрудка закрываюць па загадзе ўладаў і на доўгія гады кансервуюць. Каталікі вярнуліся ў храм толькі ў 1906 годзе, пасля чаго пачынаецца доўгая рэстаўрацыя. З 1929 года ў сценах касцёла дзейнічала місія манашак-назарэцянак.
У 1943 годзе, падчас нямецкай акупацыі, 11 манашак былі забітыя. Папа Ян Павел II прылічыў пакутніц да ліку святых. У памяць устаноўлены мемарыяльны камень побач з касцёлам.
Фарны касцёл знаходзіцца ў горадзе Навагрудак на вуліцы 1 Мая. Яго лёгка знайсці, размяшчэнне на мапе:
Што яшчэ паглядзець у гэтым рэгіёне? У самім Наваградку зазірніце да касцёлу святога Міхала Арханёла і Барысаглебскай царквы.
