Ружаны добра вядомыя сваёй галоўнай славутасцю - палацам Сапегаў, аднак у гарадскім пасёлку хапае і іншых цікавых аб'ектаў. Напрыклад недалёка ад гістарычнага цэнтра знаходзіцца невялікі касцёл Святога Казіміра, які будаваўся яшчэ ў канцы 18 стагоддзя пры кляштары базыльянаў.
Да будаўніцтва гэтай капліцы прыклаў руку тагачасны ўладальнік Ружан - Аляксандр Міхаіл Сапега, а праектам будынка займаўся яго архітэктар-фаварыт - Ян Самуэль Бекер. У выніку атрымаўся кампактны прастакутны касцёл з рысамі архітэктуры класіцызм, дамінантай якога з'яўляецца масіўны порцік дарыйскага ордэна з чатырма калонамі.
Цікаўны той факт, што касцёл будаваўся не як фамільная пахавальня Сапегаў, а верагодна як “сховішча” для мошчаў Каралевіча Казіміра (дарэчы менавіта ён намаляваны на гербе Ружан). Лічыцца што мошчы гэтага Святога мелі цудатворныя ўласцівасці, вось Аляксандр Сапега і вырашыў пабудаваць для такой рэліквіі асобны храм.
Вакол старажытнай каплічкі вялікія каталіцкія могілкі, некаторыя пахаванні тут датуюцца канцом 19 – першай паловы 20 стагоддзя.
У пачатку вясны 2023 года касцёл Святога Казіміра пачалі аднаўляць. Да гэтага капліца стаяла занядбанай доўгія гады.
Храм размяшчаецца на мясцовых могілках, ад цэнтра трэба з'ехаць на вуліцу Чырвонаармейская і трымацца лявей, ніжэй кропка з размяшчэннем на мапе:
У Ружанах варта паглядзець на руіны сінагогі і Траецкі касцёл. Таксама раю з'ездзіць у Дзярэчын, дзе знаходзілася адна з галоўных рэзідэнцый Сапегаў на тэрыторыі Беларусі.
