Ула – гэта даволі старажытнае мястэчка, якое ўваходзіла ў склад Полацкага княства і вядомае ў летапісе з 14 стагоддзя. Сённяшняя Ула – гэта ўжо аграгарадок у Бешанковіцкім раёне, а са славутасцяў тут можна вылучыць праваслаўны храм і Траецкі касцёл, пра які раскажу крыху падрабязней.
Першы драўляны касцёл на гэтым месцы быў пабудаваны яшчэ ў 1699 годзе. Што цікава, да будаўніцтва храма, тут стаяў сапраўдны замак.
Будаўніцтва мураванага касцёла пачалі ў 1853 годзе і з вялікімі цяжкасцямі скончылі праз 11 гадоў.
Па выніку гэтых работ атрымаўся цікавы помнік класічнай архітэктуры з сіметрычнымі двух'яруснымі вежамі, скатным дахам і трохкутным франтонам. Менавіта такі храм можна ўбачыць на карціне легендарнага вандроўніка Напалеона Орды.
Траецкі касцёл ва Уле зачынілі ў 1935 годзе. Будынак забралі ў каталіцкай абшчыны і сталі выкарыстоўваць як склад для сельскагаспадарчай прадукцыі.
У час Другой сусветнай вайны касцёл пацярпеў, але не быў разбураны. Ужо пасля заканчэння вайны будынак перабудавалі пад клуб, тады ж знеслі вежы.
З 60-ых касцёл стаяў напаўзакінутым і не выкарыстоўваўся. Аднаўленнем храма заняліся толькі ў 1999 годзе.
Касцёл знаходзіцца ў самым канцы вуліцы Ленінская, ніжэй кропка з пазнакай на мапе:
Калі будзеце ў гэтых краях, то рэкамендую з'ездзіць таксама ў Бешанковічы ці паглядзець на руіны храма ў вёсцы Губіна.