Цікаўны прыклад драўлянай архітэктуры Беларусі размяшчаецца ў маляўнічай вёсцы Лоск - гэта касцёл Сэрца Ісуса, які сёння на жаль стаіць напаўзакінутым.
Храм пабудаваны з бруса ў першай палове 20 стагоддзі, па ўсёй бачнасці на тым самым месцы дзе некалі ўжо стаяў касцёл-папярэднік, разабраны ў 1874 годзе.
З датай будаўніцтва ёсць блытаніна, большасць крыніц называюць 1930 - годам завяршэння работ.
Аднак ёсць усе падставы меркаваць, што касцёл пабудавалі раней, бо як мінімум адзін стары здымак датуецца 1924 годам.
Будавалі храм у перыяд, калі Лоск быў у складзе міжваеннай Польшчы, аднак прыход дзейнічаў нейкі час і ў пасляваенныя гады. Канчаткова касцёл закрылі ў 1959 годзе, а пабудову перапрафілявалі пад сельскагаспадарчыя патрэбы.
Часткова архітэктура будынка захавалася ў першапачатковым выглядзе, галоўная змена закранулі фасад - былі знесены дзве вежы.
Справа ад касцёла ёсць драўляная хатка, датуецца 1935 годам (захаваўся закладны камень з датай), будаваўся ён як плябанія. Даволі доўга будынак пуставаў, але не так даўно яго выкупілі і крыху прывялі ў норму.
За касцёлам ёсць і некалькі старых магіл, адна з якіх належыць ксяндзу.
Далей па вуліцы знаходзіцца царква Святога Георгія, а крыху бліжэй да цэнтра - гарадзішча 14 стагоддзя.
Калісьці ў Лоску быў і старажытны маёнтак, праўда даехаць да патрэбнага месца зімой дастаткова складана, таму без фота.
Былы касцёл стаіць на галоўнай вуліцы вёскі Лоск, ніжэй кропка з пазнакай на мапе:
Калі будзеце ў гэтых краях, то рэкамендую з'ездзіць таксама ў Крэва і Валожын.