За некалькі кіламетраў ад Слоніма ёсць дзве вёскі, Дзеравянчыцы і Бракава, якія з пачатку 19 стагоддзя належалі роду Ордаў. Тут у іх быў аднайменны фальварак Дзеравянчыцы (сёння адносіцца да тэрыторыі вёскі Бракава) з шыкоўным палацам і фамільнай капліцай-пахавальняй. Нажаль палац не захаваўся, затое капліца дайшла да нашых дзён амаль у першапачатковым выглядзе.
Капліцу пабудавалі ў 1852 годзе на замову Пятра Орды ў памяць аб яго памерлай жонцы Эвілене. Кампактная каплічка выканана з жоўтай цэглы ў папулярным для таго часу неагатычным стылі. Упрыгожана арачным парталам з трохкутнай нішай, сцены упрыгожаны карнізам з пілястрамі, а завяршаецца пабудова невялікай вежкай па баках ад якой размяшчаюцца пінаклі.
У другой палове 19 стагоддзі гэтыя краі наведваў Напалеон Орда (вядомай прадстаўнік гэтага роду, але па іншай галіне) і намаляваў пахавальню. Як бачна, знешне пабудова змянілася нязначна, у вочы кідаецца толькі перабудаваная вежка.
Орды валодалі маёнткам да 1927 года, пасля чаго багатыя землі перайшлі да Іосіфа Абязерскага. Амаль усе вядомыя прадстаўнікі слонімскай галіны Ордаў былі пахаваны ў крыпце гэтай капліцы.
Апошні прадстаўнік па лініі Ордаў, Іосіф, атрымаў дазвол на правядзенне ў каплічцы службаў і богаслужэнняў у 1904 годзе.
У савецкі час капліцу перабудавалі і пачалі выкарыстоўваць як склад для ўгнаенняў. Справа ад уваходу з'явіўся новы аднапавярховы аб'ём, знесена вежа, спрошчаны дах.
У пачатку 90-ых гэты помнік архітэктуры вярнулі вернікам, якія змаглі аднавіць спадчыну Ордаў. З 2007 года тут ізноў праводзяцца службы, а на сцяне з'явілася памятная шыльда з гісторыяй будаўніцтва.
Што вядома пра палац Ордаў? Дзіўна, але зусім няшмат. Верагодна сядзіба ў Дзеравянчыцах пабудавана Пятром Ордой, тым самым які ўзвёў капліцу. Пры ім рэгіён расквітаў: павялічвалася насельніцтва, пабудаваны завод па вытворчасці цэглы, бровар. Дзякуючы старому аэрафотаздымку можна ўбачыць, як выглядала валоданне роду ў пачатку 20 стагоддзя.
Цэнтральная частка палаца мела адзін паверх, па баках прымыкалі двухпавярховыя флігелі, а перад уездам быў разбіты газон у форме круга з алеяй з дрэў. Мяркую, што знешне палац чымсьці нагадваў сядзібу Плятэраў у Опсе.
Акрамя самога палаца былі пабудаваны і шматлікія гаспадарчыя пабудовы. Праўда да нашых дзён захаваўся толькі адзін будынак - былы дом для працоўных.
Магчыма яго выкупілі і зараз спрабуюць аднавіць, ужо бачныя новыя вокны.
Знайсці капліцу будзе проста, ад Слоніма згортвайце на дарогу Н6348 і рухайцеся да першага з'езда на жвірыйку, не даязджаючы Бракава, ніжэй кропка з адзнакай на мапе:
У гэтых краях рэкамендую паглядзець маёнтак Пуслоўскіх "Альберцін", а таксама незвычайны расколаты валун у Якімавічах.
