У горадзе Клецк, літаральна ў 15 км ад Нясвіжа, захаваўся старажытны помнік архітэктуры 17 стагоддзя - Васкрасенская царква, аднак першапачаткова гэта быў дамініканскі касцёл пры манастыры.
Пачатак будаўніцтва храма прыпадае на 1683 год (*у некаторых крыніцах сустракаецца іншая дата – 1776 год). У той час гэтыя землі належалі Станіславу Казіміру Радзівілу, які і заснаваў кляштар для манахаў ордэна Святога Дамініка.
Месца для кляштара абралі на рынкавым пляцы старога Клецка.
Касцёл збудаваны з цэглы ў барочным стылі і быў асвечаны імем Звеставання Найсвяцейшай Панны Марыі.
Побач з ім адбудаваны жылы корпус для манахаў-дамініканаў. Цяпер у гэтым гістарычным будынку знаходзяцца цэнтр занятасці насельніцтва і раённы архіў.
З 1783 года пры кляштары дзейнічала пачатковая школа. За актыўны ўдзел дамініканцаў у паўстанні 1830-31 гадоў школу і кляштар зачынілі, а манахаў адправілі ў Нясвіж. Сам будынак кляштара ў той перыяд перадалі вайскоўцам пад казармы.
Касцёл у царкву - як так выйшла?
Больш за 10 гадоў касцёл пуставаў, затым перароблены пад праваслаўную царкву. У 1854 годзе храм адрамантаваны на грошы Радзівілаў.
У пачатку 20 стагоддзя адбыўся пажар, які нанёс значную шкоду клецкай царкве. Сродкаў на аднаўленне не было і храм доўгі час стаяў напаўзакінуты.
Рэканструкцыя царквы ў Клецку
З 60-ых гадоў у сценах храма працавала спартзала, а крыху пазней – склад аднаго з мясцовых заводаў. У 80-ыя ўшчыльную да царквы прыбудавалі трохпавярховы цагляны будынак інтэрната, які сёння мае даволі непрывабны выгляд.
У пачатку 1990 года царкву зноў перадалі праваслаўнай абшчыне. Высілкамі мясцовых жыхароў пачалася рэканструкцыя велічнага храма. Фасад абтынкавалі і пафарбавалі, а на дах паклалі чырвоную чарапіцу і ўсталявалі цыбульныя купалы. Знайсці царкву ў Клецку лёгка, глядзіце размяшчэнне на мапе:
Калі будзеце праездам у горадзе, абавязкова наведайце Пакроўскую царкву, ешыву і польскія ваенныя кашары.
Прыгожы храм, адзінае што аблічча псуе адміністрацыйны будынак прама перад уваходам